NekoCatz - This is Life...isn't all fun

唔知係我發燒定係出疹，塊面紅到成個蘋果咁，痕但係又唔可以ｒ喎，好慘啊！已經成兩個星期啦～～～咪咪仲係度講，依家好似好流行登革熱喎，我豬仔仲過份又無常識，佢居然話「你唔好野埋我添喎」！乜登革熱可以就咁人對人傳播架咩？係好痕好痕但係又唔可以ｒ佢的情況之下，唯有係咁洗白白，一日沖四五次涼，遲早洗到我甩皮......

昨日去左和合石拜山，因為怕重陽果日會多人，點知今日都冇人去既，靜英英咁，仲冇封路添啊，可以坐的士上去唔駛行，好好彩走果陣又有的士，唔係就要行出去等巴士囉！因為我同牛牛兩個行路好慢，如果就咁行出去都要差唔多半個鐘啊！

依兩日都好少對住個電腦都係食左藥就休息，其他時間都係畫草稿多，好努力咁學緊畫 CG，不過好多都唔見得人呢！廢紙的數目比起成功畫起線稿的數目高出 N 咁多倍，真係覺得自己唔掂！

突然有種想讀返書既衝動，心中既果一團火又開始燒到熊熊聲，不過仲未開始行動，亦都唔知學咩好，我諗今次依團火都好快會熄囉～呵呵