NekoCatz - This is Life...isn't all fun

今日拎左ｄ燈返左屋企，順便話俾師傅聽ｄ電制插頭位係邊。點知個師傅遲到 (佢話尋晚俾人捉左去打麻雀所以訓晏左喎)，係佢未到之前，牛牛同豬仔就同舖地磚果個師傅傾計 (佢地分開泥水、電線同油油既師傅架)，果個師傅話露台果度個地台斜既，要整返平黎舖地磚既話可能會開唔到廁所門同埋冇左個去水位 (我住緊舊式 H 字型五人單位)，好在度過尺寸之後可以試下改門較位睇下得唔得，唔得既話就只有換廁所囉！而去水位則一定要再做過呢！

到左十二點左右咩都搞掂晒之後，我地三個人去左屯門既海馬特賣場睇傢俬，豬仔係報紙睇中左佢地既梳化床，而且海馬減價推銷，順便睇下仲有咩平喎！入到置樂個清貨場，得兩個舖位好鬼細，好多都係得相睇，不過佢地都睇中左兩個衣櫃、一張雙人床、一張梳化床同一套飯桌連四張椅。計埋全部大約三千五左右，我果張床就未決定，我依家未有心水，遲多兩日再算啦！個 sales 姐姐話如果要買既就要早ｄ，因為要最少十日，最好預佢兩個星期先有貨喎。咪咪今日不在場，所以都冇落實，始終都要等埋皇太后大人肯首先喎！

今晚我自己整薯蓉食，有洋蔥、煙肉同腸仔！食到我飽到上心口！！