NekoCatz - This is Life...isn't all fun

今日要返醫院覆診，平時都係一個月返去一次，不過上一次覆診換左隻新藥，唔知道反應會點，所以醫生話今次半個月就要返去見佢囉。每次見醫生都係咁，問下點啊最近有冇咩特別唔舒服啊之類，跟住就話記得準時食藥啊，下次返黎再見你啦！見埋社工部既姑娘，傾左一陣計，佢問我做咩成個細路女咁，話我唔似成年人喎，真係話俾人知我今年廿ｘ歲都冇人信！咪咪又係度講啊講，兩個雞啄唔斷咁講左好耐，悶死我。

是日公公生日，睇完醫生就同埋咪咪係沙田搭車出去太古同公公食飯啊！唔好話我大鄉里，話時話依家真係唔識搭車，連地鐵要係邊個站轉都唔知，多左條線又唔鬼知喎，好在仲識睇地圖，識係油塘轉車，本身個月台姐姐仔叫我同咪咪搭油麻地果邊轉架，不過我一向搭開側魚涌果邊轉，依家多左條將軍澳線亂左龍之嘛。

一出地鐵站口太古城廣場果度有間馬莎，咪咪突然間一聲「試食啊」就衝左埋去。都唔知扮識佢好定唔識就咁行左去好。記得以前都試過一次，我同咪咪係上水行街果陣，本身我地係馬路邊架，但係我見到個冇人係度既櫃員機有錢喎，咁咪指住部機同咪咪講「個櫃員機有錢喎」，我都未講完句說話，佢就一個箭步衝左埋去拿左錢，成千蚊啊，不過分得一百俾我，到依家仲成日講返出黎話我遲鈍講得黎都衝左埋去拿啦咁喎，師奶即係師奶，有時候都會諗，唔知第時會唔會好似咪咪咁呢？不過只係想像已經令到我覺得很可怕......