NekoCatz - This is Life...isn't all fun

昨晚收到朋友仔介介既電話，話伯伯約左佢食飯叫埋我出去，有人請食飯喎，當然要去啦！

約左一點半係信和門口等，我好笨笨咁樣遲左十分鐘（對唔住啊介介），不過有人遲過我，伯伯佢遲左足足半個鐘！！！我仲同介介講笑，話如果遲到要罰錢錢咁我地就發達啦！伯伯到左之後第一句就話我剪到個頭咁型，跟住我即刻搭口話「家下我媾死女囉！咁鬼型！」雖則我對女仔沒有多大興趣......人家又不是同性戀......

伯伯到左之後問我地想食ｄ乜，不過我同介介都係冇乜主見既人，於是就諗住跟住條街行睇下有乜食啦，去到一間日本野同粥舖面前伯伯就問我地食邊樣，因為上次出黎食飯食左日本野，而且天氣凍凍嘛，我就話食粥啦。

我叫左一碗牛肉粥，伯伯叫左白粥，介介諗左好耐先決定食肉丸粥，因為我地三個都好怕熱，所以食得好慢啊！伯伯叫左好多其他野食，有炒麵、腸粉、牛肉腸粉、蘿蔔糕、咸肉粽，我覺得蘿蔔糕最好味呢！

食完野我地傾左陣計，跟住去左信和行下，我想搵泓景台果個廣告入面首歌啊，聽人講話係Le Couple唱架，不過行左成個信和都搵唔到啊。因為同左咪咪講夜晚返屋企食飯，所以行完信和就去左搭巴士返屋企。

今日係樓下既漫畫舖度租左第一至三冊哈利波特既小說睇，一本厚過一本，睇第一本果陣已經有睇到唔想放低既感覺啦！！！唔怪得知真係咁多人話好正啦～