NekoCatz - This is Life...isn't all fun

因為細孖寶間屋細，而死肥仔同脾脾日益肥壯，所以佢地兩個一齊入屋屋既話會非常極之地擠迫。用想像的話，就像將兩舊肥厚厚既毛毛球硬塞入一個小空間，雖則係我地既角度見到咁會覺得佢地好可愛，不過大熱天時既話就慘慘囉！所以家陣佢地兩個係輪住咁入屋仔訓，夜晚果陣見到一隻係出面孤單單咁，我地就決定要幫佢地換過間大 d 既屋。

今日一早起身，我地一家人去麥當當食完野，就搭火車出去旺角雀仔街。除左傻雞同 B 太係聯和壚既雀仔舖買之外，死肥仔、脾脾、同埋佢地既籠啊屋啊，都係旺角雀仔街買架。連佢地食既糧啊、雀粟、仲有平時玩果 D 玩具都係。

我地習慣每次去到都會行下先，不過就會係返同一間舖頭買野。我地行緊去平時買屋買玩具既舖頭果陣，離遠就見到老闆放左一盤剛剛出世一個月既雞尾鸚鵡寶寶係度。雞尾鸚鵡即係大孖寶：傻雞同 B 太果隻種，不過呢，大孖寶係變種既黃化雞尾鸚鵡。

咁我一見到有寶寶就即刻走埋去同佢地玩啦！依批寶寶應該由人親手餵大，所以都唔怕人。其中有一隻寶寶我地離遠已經見到佢特別醒目，一黎佢企左上盤邊，二黎佢好鬼醒，見到人就撩人玩，叫佢又識應人喎！總之就好鬼死醒目啦！我同佢玩得好開心，就連豬仔同牛牛都話佢好醒，咪咪又好鐘意佢喎！不過佢地話屋企已經有四隻啦，所以都係唔買咁話。

係佢地三個係度選屋果陣，我仍然繼續同果隻寶寶玩，咪咪見我咁樣，又走埋黎，點知佢一埋到黎，隻寶寶就唔理我，係咁同咪咪玩，咪咪伸隻手指過去，佢用個頭鍚鍚之後仲走埋上去咪咪隻手指度企喎！咪咪開心到不得了，係咁話佢好醒啊！依個時候豬仔就話：「佢知道係你話事買唔買，所以唔理你個女走黎理你！」咪咪同佢玩左一陣，真係覺得佢好醒又好精靈，於是都係忍唔住同老闆開價，起初老闆開百二，咪咪話貴喎，回價八十，老闆話好啦賣啦，就係咁屋企又多左隻寶寶囉。

依隻寶寶真係 baby 黎架，佢只有一個月大，剛剛出完毛毛，而佢係原種既虎皮鸚鵡，係囡囡黎，灰灰綠綠咁好靚架！等時佢大個囡之後會好靚女架！因為佢依家灰灰黑黑咁，我一開始幫佢改左個名叫「小黑 B」，不過俾豬仔同咪咪否決定。因為「小黑」依個名對我地屋企有特別意義，而關於「小黑」既故事就唔係度長述囉！遲些有空在自言自語那裡說好了。回正題囉！因為新寶寶依家既毛毛有好多種唔同既顏色，咪咪就話要叫佢做「花花」。因為我堅持佢要有個 B 名，所以佢個 B 名就叫做「花 B」。

花花佢家陣仲要人餵，而且未識企定，學緊行路咋，見到佢肥 do do 咁係度左搖右擺咁學行路，真係好鬼死得意架！佢仲未識得轉身啊，企左係度之後就只係識得企同一個方向，唔識自己掉轉企望去另一邊。佢除左鐘意人同佢掃背背之外，仲鐘意人摸佢頭頭同咬人手指。

夜晚我地試過自己餵過花花兩次，依家開始熟習點樣餵小 baby 囉！不過呢，要記得餵佢地之後先沖涼，因為佢地會噴到你成身都係糊糊。