NekoCatz - This is Life...isn't all fun

傻花佢開始學飛啦！不過佢對翼仔俾老闆剪過，所以飛唔起又飛唔遠，我地已經好小心咁睇住佢，點知尋晚都係發生左意外。因為我感冒既關係，豬仔同牛牛實施人畜分離政策，唔准我接近傻花。所以我都係聽返黎冇親眼見。

事源尋晚豬仔想餵傻花果陣，牛牛將傻花係個箱度拿出黎，就係依個時候，傻花突然間伸開對翼仔，係牛牛隻手指度向外一跳，一邊拍拍拍對翼仔一邊向下跌，跌左落地下。牛牛同豬仔即刻好驚咁捉住佢放返上將食飯枱度啦！望落去佢好似冇咩咁，只係好驚咁係度好急咁透氣，仲成日貼住牛牛同豬仔隻手係度撒嬌，佢兩個見佢咁樣就話佢唔識飛做咩學人飛呢！家陣嚇死啦！睇你仲敢唔敢啊！傻花就 bu bu bu 咁係咁撒嬌，好似話佢唔敢啦！之後豬仔就餵佢食糊糊啦！食緊果陣，牛牛就話，點解傻花行路果陣拐下拐下既，豬仔就唔為意喎，到餵晒 d 糊糊之後，傻花通常會係將食飯枱度散步步架嘛，點知佢企定定唔郁喎！豬仔咪推佢叫佢行下囉，傻花好唔情願咁係度行，行到枴枴下，企左果陣又縮起隻左腳喎，跟住牛牛就話，死囉唔知係咪頭先佢整到呢！佢地捉住傻花黎檢查又唔多覺邊度唔妥，但係佢又剩係單腳企又唔肯行，最後佢地都唯有放佢返膠箱，等佢休息下先。

尋晚我訓唔著，成晚都冇訓，我有出廳望過隻傻花，成晚都單腳企係度訓。今朝咪咪返黎餵佢果陣，我就同佢講，傻花好似整到隻腳仔喎！咪咪話唔係啊嘛，就好緊張咁檢查啦！睇到佢左腳仔個關節位紅左同緟左，我地咪用獅子油幫佢楂囉！就係咁每餐餵佢果陣都幫佢楂藥油，之後佢又開始行下行下咁，冇話企左左囉！

教養雀果本書話，雀仔好少會骨折，最易既就係初初學飛果陣，睇黎我地都要緊加小心咁睇住佢囉！

傻雞同 b 太都係咁啊，唔多點理人。不過今朝我地將傻花拿出露台晒太陽果陣，都出左黎一陣睇傻花，可能佢地雀仔有溝通知傻花整親掛，又或者見我地咁多個都企晒係度掛。

至於死肥仔同脾脾呢，睇黎佢地對傻花好有興趣，不過死肥仔就有 d 呷醋，因為牛牛掛住理傻花少左同佢玩，所以今朝死肥仔咬左牛牛一啖大大啖應應的，咬到牛牛叫痛都唔放手。

雀仔都好有靈性架，而且都好有感情！